Өфөлә Совет майҙанын төҙөкләндереү аҙағына яҡынлаша. Проект Мифтахетдин Аҡмулла исемендәге Башҡорт Дәүләт педагогия университеты менән 1-се музыка мәктәбе араһындағы скверҙы яңыртыуҙы ла күҙаллай.
Бер нисә ай элек Совет майҙаны ҡала үҙәгендә автомобиль ҡуйыу урындарының береһе генә ине. Әле бында ял көндәрендә лә эш ҡайнай. Йөҙгә яҡын хеҙмәткәр, буласаҡ фонтанды һыу селтәренә тоташтырған, гранит һәм мәрмәр түшәгән. Ҡоролмаға һынау үткәреү өсөн дә күп ҡалмаған.
Совет майҙанындағы фонтан Өфө өсөн яңы күренеш. Конструкцияның һыу һауыты юҡ. Фонтан һүндерелгән хәлдә майҙанда уның барлығы бөтөнләй һиҙелмәй. Ҡоролма 108 һиптерткестән тора. Һыу бағанаһы 7 метр бейеклеккә күтәрелә.
Йәйәүлеләр өсөн биләмә боллард, йәғни юлды автоматик кәртәләү ҡоролмаһы менән йыһазландырыла. Эскәмйәләр, урналар һәм яҡтыртыу ҡоролмалары заман талаптарын иҫәпкә алып эшләнгән. Майҙанда видеокүҙәтеү камералары һәм вай-фай станцияһы ҡуйыла. Биләмә тирәләй саған һәм туя ағастары ултыртыла.
Уҙған аҙнала Башҡортостан башлығы Рәсәй геройы генерал Миңлеғәле Шайморатов иҫтәлегенә һәйкәлгә конкурс иғлан итте. Указ хоҡуҡи мәғлүмәт рәсми порталында урын алған. Данлыҡлы командир һыны майҙанда ҡоролғас, Өфө үҙәгендәге күркәм йәмәғәт биләмәләренең береһе халыҡҡа асылыр тип көтөлә.
Гөлдәриә Йосопова.