Йылдам үҫеш биләмәһе резиденты быйыл июндә генә эш башлауына ҡарамаҫтан, 52 миллион һумлыҡ биш мең әҙер изделие сығарған.
2020 йылды Зауыҡлы биләмәләр йылы тип иғлан итеү менән эскәмйә, яҡтыртыу ҡорамалдары , балалар уйыны майҙансыҡтары һәм воркаут-тренажерҙарға ихтыяж тағы ла артҡан. Элекке келәттәрҙә урынлашҡан ойошмала 187 хеҙмәткәр эшләй. Уртаса эш хаҡы 35 мең һум тирәһе.
Йылдам үҫеш биләмәһе резиденты булараҡ предприятие һалым ташламалары менән файҙалана. Был иһә сығарылған әйберҙәргә лә хаҡтарҙы түбән тотоу мөмкинлеге бирә. Ҡорамалдарҙы башлыса райондар һәм идарасы компаниялар һатып ала.
Йәмғиәт етәкселеге артабан ҡаты көнкүреш ҡалдыҡтары өсөн евроконтейнерҙар ҡойоу эшен яйға һаласаҡ.Бының өсөн 6 мең квадрат метрҙан ашыу майҙанлы бина ремонтлана. Инвесторҙар 3 йөҙ миллион һум аҡса һалып өҫтәмә илле эш урыны булдырырға иҫәп тота.
Айнур Кәбиров.