План буйынса йыл аҙағына тиклем күрһәткесте бишәүгә еткереү маҡсаты тора ине.
Әммә бөгөнгө Эксперт советы ултырышында билдәләнеүенсә, план арттырып үтәлгән. Бөгөн резиденттар исемлегенә үҙ проекттарын яҡлап «Азимут» һәм «Заспорт» компаниялары өҫтәлде. Эксперт советы ултырышы онлайн форматта, Башҡортостан Хөкүмәте Премьер-министрының беренсе урынбаҫары Илшат Тажетдинов етәкселегендә уҙҙы. «Алға» махсус иҡтисади зонаһында ғәмәлгә индереләсәк ике проект 330 тирәһе яңы эш урыны аса, тине Илшат Азамат улы.
Дизайнер спорт кейемдәре менән тотош донъяға билдәле «Заспорт» компанияһы үҙ проектын киләһе ике йылда сафҡа индерергә ниәтләй. Хужалар әйтеүенсә, фабриканың продукцияһына ихтыяж ҙур. Спорт кейемдәре уңайлы һәм юғары сифатлы булыуы менән айырлып тора. Компания 300-гә яҡын кешене эш менән тәьмин итәсәк.
Ырымбурҙың «Азимут» заводы юл һыҙаттары, билдәләр өсөн заманса технологиялар ярҙамында буяуҙар һәм пластик етештерә. Киләсәктә был предприятие ла «Алға» махсус иҡтисади зонаһында эш башларға иҫәп тота. Юлдар оҙонлоғо буйынса Рәсәйҙә икенсе урын билгән Башҡортостан өсөн проект бик мөһим, быйыл ғына республикала 10 мең километрға юл һыҙаттары һалынған. Проектҡа 500 миллион һум тирәһе инвестиция һалыу күҙаллана, бөтәһе 40-тан ашыу яңы эш урыны асылыр тип көтөлә.
Рәмзиә Кәримова.