Ул да булһа “балыҡсы” ырыуы. Тәү ҡарашҡа аңлашылып та бөтмәй кеүек. Кемдәр улар, биләмәләре ҡайҙа? Һорауға яуапты балыҡсы ырыуы башҡорттарының йыйынынан әҙерләнгән яҙмала табырға мөмкин.
Балыҡсы ырыуы башҡорттары ярайһы уҡ тығыҙ биләмәләрҙә йәшәгән халыҡ. Уларҙың төп йәшәгән ерҙәре хәҙерге Асҡын районына тура килә. Бында 14 ауыл иҫәпләнә улар. Боронғо йоланы тотоп, йыйын ҡунаҡтарын олпат ир-уҙамандары, аҡһаҡалдар ҡаршы алды унда.
Йыйында тарихсылар, тыуған яҡты өйрәнеүселәр, республика “Ағинәйҙәр” ойошмаһы вәкилдәре, Республика халыҡ ижады Үҙәге эксперттары ҡатнашты. Бөтә донья башҡорттары ҡоролтайы башҡарма комитеты Президиумы рәйесе Эльвира Айытҡолова асҡындарҙың рухиәтте һаҡлауҙағы эшен юғары баһаланы һәм ҡоролтай иғлан иткән яңы проектарҙың барыһында ла әүҙем булырға өндәне.
Балыҡсы ырыуы башҡорттарының һөйләше, төнъяҡ-көнбайыш диалекты булараҡ, уҙған быуаттың 50-се йылдарынан алып башҡорт әҙәби теле сиктәренән хаҡһыҙ рәүештә төшөрөп ҡалдырылған. Башҡорт тел белгестәре, диалектологтары, бөтә йәмәғәт алдында бөгөнгө бурыс- төньяҡ-көнбайыш диалектын таныу, уны инҡар итмәү.
Йыйында Балыҡсы ырыуы Советы ойошторолдо, уға һәр ауылдан берәр делегат ағза итеп барлығы 13 кеше, совет рәйесе итеп бер тауыштан Ҡашҡа ауылынан тыуған яҡты өйрәнеүсе Наил Хәйруллин һайланды. Ул тарихты боҙоп күрһәтеү юлдарын иҫкәртеү осраҡтарын иҫкәртеү маҡсатында Республика тыуған яҡты өйрәнеүселәре сьезын ойоштороу, Солтанбәк ауылы уҙаманы, хоҡуҡ белгесе Венир Сәмиғуллин Балыҡсы ырыуы фондын булдырыу тәҡдиме менән сығыш яһаны. Йыйында ырыу гербы һәм гимны раҫланды.
Рәшиҙә Ишембәтова.