Республика Хөкүмәтендә WorldSkills Russia милли чемпионатына әҙерлек буйынса эшлекле кәңәшмә уҙҙы. Уны беренсе вице-премьер – Иҡтисади үҫеш һәм инвестиция сәйәсәте министры Рөстәм Моратов үткәрҙе. 12 апрелдә ил төбәктәрендә йәш һөнәрмәндәр конкурсына һайлап алыу турҙары башлана. Ошо уңайҙан Өфөлә волонтерҙар һәм студенттар ҡатнашлығында “Чемпионат башланыуға 100 көн” тигән флешмоб ойоштороу ҡарала. WorldSkills Russia милли чемпионаты Өфөлә 21-25 июлдә үтә. Сараны асыу тантанаһы “Өфө-Арена” спорт комплексында була. Ярыш Йәш һөнәрмәндәр паркында уҙа.