Дауалау курсы бушлай, 10 көндән 21 көнгәсә иҫәпләнгән. Һәр пациентҡа шәхси һауығыу программаһы төҙөлә, дарыу-уколдарҙан тыш, физиотерапия процедуралары ла ҡаралған. Коронавирустан һуң сәләмәтлеген нығытыусылар менән БЮТ каналы хәбәрсеһе Гөлназ Хәйбуллина осрашты.
Үҙаллы тын алып, һулар һауаның ҡәҙерен яҡшы белә улар. Дауалау гимнастикаһында Ковид-19 инфекцияһын үткәргән пациенттар. Һәр ҡайһыһы үпкә шешеүе, күкрәк ҡыҫылыуы эҙемтәләрен бөтөрөргә теләй. Өфөнән Миңлегөл Кәримованы коронавирус былтыр декабрҙә аяғынан йыҡҡан. Ҡатмарлы сир ғаиләһенә лә оло юғалтыуҙар килтерә.
Республика табип-физкультура диспансерында уҙған йылдың авгусынан алып коронавирусты үткәреүселәргә реабилитация ойошторола. Билдәле булыуынса, көндөҙгө стационарҙа 250 пациент ҡабул ителеп, сәләмәтлеген яҡшыртҡан.
Диспансерға килеүселәрҙе башта табип-терапевт ҡарай, тап ул пациенттарға шәхси һауығыу программаһын билдәләй. Коронавирус хроник сирлеләр өсөн үтә лә мәкерле, шуға күрә ауырыу эҙемтәләрен юҡ итеүҙә төрлө алымдар ҡулланыла.
Әлегә медицина учреждениеһында коронавирустан һуң комплексы реабилитацияны туғыҙ пациент үтә. Улар республиканың төрлө район-ҡалаларынан килгән. Пациенттарға дарыу-системаларҙан тыш, ҡоро углекислоталы ванна, массаж кеүек процедуралар ҙа ҡаралған. Диспансер хеҙмәткәре Салауат Әлибаев Ковид-19 инфекцияһы менән яҡшы таныш, реабилитацияның организм өсөн мөһимлеген билдәләй.
«Хәрәкәттә бәрәкәт» тигәндәй, белгестәр коронавирустан һуң күберәк саф һауала йөрөргә кәңәш итә. Әйткәндәй, медицина учреждениеһында ковид-19 инфекцияһынан тыш, кардиология, неврология ауырыуҙарынан яфаланған, төрлө тән йәрәхәттәре алған пациенттар ҙа реабилитация үтә ала. Диспансерҙа Бөйөк Ватан һуғышы ветерандарын да бушлай ҡабул итергә, дауалау курсына йөрөүгә транспорт менән тәьмин итергә әҙерҙәр.
Гөлназ Хәйбуллина