Быйыл республикала милли проекттарҙы финанслау өсөн 27 миллиард һум ҡаралған

Аҡсаның күп өлөшө федераль ҡаҙнанан бүленгән. Был турала беренсе вице-премьер – Хөкүмәт Аппараты етәксеһе Илшат Тажетдинов белдерҙе.

Республикала йыл аҙағына тиклем 2 миллион квадрат метрҙан ашыу торлаҡ төҙөү һәм сафҡа индереү, 150-гә яҡын йәмәғәт биләмәһен төҙөкләндереү, автомобиль юлдарын ремонтлау планлаштырыла. Өфөнөң Киров районында Ағиҙел йылғаһы аша күперҙе яңыртыуҙың беренсе этабын тамамлау бурысы тора.

“Милли проекттарҙың һөҙөмтәһе тураһында халыҡҡа мәғлүмәт еткереү мөһим. Был ил президентының башланғысы. Кешеләр ниндәй эштәр башҡарылыуы хаҡында хәбәрҙар булырға тейеш”, - тине Радий Хәбиров. Республика етәксеһе милли проекттар буйынса төҙөлгән ҡайһы бер объекттарҙа етешһеҙлектәр асыҡланыуына иғтибар итергә ҡушты.