Программа буйынса бер эш урынын булдырыуға дәүләт 57 мең 460 һум күләмендә компенсация түләй. Сумманы эш хаҡы түләүгә, эш урынын йыһазландырыу кеүек сығымдарҙы ҡаплау өсөн йүнәлтелә. Программа Бөрө ҡалаһында нисек ғәмәлгә ашырыла? БЮТ каналы хәбәрсеһе Әлфинә Килдейәрова яҙмаһында.
Цемент ҡатнашмаһын әҙерләп, стеналарҙы тигеҙләү - Виталий Шамшиевтың көндәлек эше. Ул Бөрө ҡалаһы өсөн мөһим социаль объект төҙөлөшөндә ҡатнаша. Дүрт ҡатлы поликлиниканы йыл аҙағына сафҡа индереү бурысы тора. Был эште Виталий Шамшиев күптән түгел мәшғүллек үҙәгенең яңы программаһы буйынса таба.
Яңы программаға ярашлы хеҙмәт урындарын юғалтғандарға эш биреүсе компаниялар субсидиялана. Быйыл марттан Рәсәй Федерацияһы Хөкүмәте ҡарары буйынса юридик һәм шәхси эшҡыуарҙарға ағсалата ярҙам күрһәтелә. Ул эш хаҡы түләү, эш урынын булдырыу, хеҙмәткәрҙе әҙерләү өсөн сарыф ителгән сығымларҙы ҡаплауҙы күҙ уңында тота. Дарья Князева Былтыр Бөрө күп профилле колледжын тамалай. Мәшғүллек үҙәгенә мөрәжәғәт итә һәм субсидиялау программаһында ҡатнашан компанияға эшкә алына.
Түләүҙәр өс этапта бара. Беренсеһен эш биреүсе тәүге айҙа алһа, икенсеһен – өс ай үткәс, өсөнсөһөн ярты йылдан һуң. Һәр түләүҙең күләме – 19 мең һумдан ашыу.
Предприятияларҙы субсидиялау программаһы буйынса Бөрө ҡалаһында 27 хеҙмәт урынын юғалтан гражданин эш менән тәьмин ителгән. Әлеге көндә мәшғүллек үҙәгендә 603 кеше иҫәпләнә. Республика буйынса меңдән ашыу эш биреүсе федераль программала ҡатнашыу өсөн ғариза биргән.
Улар эшһеҙ ултырғандарға ете мең ярым вакант урынын тәҡдим итә. Ярты йыл эсендә генә субсидиялау яраҙмында 991 хеҙмәт урынын юғалтҡан граждандар, шул иҫәптән былтыр уҡыуын тамалаған студенттар эшкә урынлашҡан.
Әлфинә Килдейәрова