Һыу ятҡылығында күпләп балыҡтар үлеүе теркәлгәйне. Урындағы халыҡ был хәлдә гидроҡоролма етәкселеген ғәйепләһә, быуа хужалары, киреһенсә, ауыл халҡының битарафлығына ишаралай. Ул арала быуаға экологик һәләкәт янай, ти белгестәр.
Табан балыҡ, алабуға, суртан, карп. Яр буйында ун килограмға еткән балыҡтар түгелеп ята. Ләкин ул балыҡсылар табышы түгел. Киреһенсә, ҙур юғалтыу.
Урындағы халыҡ әйтеүенсә, Ҡайғалыш йылғаһындағы бауала балыҡтар үлеүе һуңғы һигеҙ йыл рәттән теркәлә. Барыһына ла гидроҡоролма хужалары ғәйепле, тип һанай улар. Йәнәһе лә, яҙ быуанан һыу ағыҙғанда балыҡтар боҙ аҫтына ҡалып баҫылып ҡырыла.
Быуа етәкселеге иһә халыҡтың үҙен битарафлыҡта ғәйепләй. Балыҡтар ни бары һауа етмәгәнлектән ҡырыла, тип иҫбатлай улар.
Ҡайғалыш йылғаһы да бысратырлыҡ предприятиелар, заводтар ҙа юҡ. Йыуынты һыуҙар ҙа ағып төшөрләк түгел. Әммә ниндәй генә сәбәптән ҡырылмаһын үлгән балыҡтарҙан экологияға зыян килере билдәле.
Тәбиғәттән файҙаланыу һәм экология министрлығы иһә мәсьәләгә фәнни күҙлектән яуап бирәсәк. Һыуҙың сифатына анализдар алынды. Һөҙөмтәләр аҙна ун көндә әҙер буласаҡ. Әгәр һыу аҫты тереклеге яһалма шарттарҙа ҡырылыуы асыҡланһа, яуаплылар ҡануниәт нигеҙендә язаһын аласаҡ.
Айнур Кәбиров