Республиканың Йәмәғәт палатаһында үткән түңәрәк өҫтәлдә «Генпроект» ойошмаһы баш архитекторы Людмила Стадничук ҡала баҡсаһын яңыртыу буйынса проект тәҡдим итте. Уның буйынса ике фонтан араһында амфитеатр ҡаралған. Воркаут менән шөғөлләнеү өсөн майҙан төҙөләсәк.
Аҙ хәрәкәтләнеүсе граждандарға баҡсаның һәр мөйөшөнә үтерлек уңайлыҡтар булдырыла. Иҫке фонтандар алыштырыла. Парк үҙәгендәге клумба урынына декоратив ҡыуаҡтар, шулай уҡ бәләкәй фонтан ҡуйыла. Стеналар, баҫҡыстар яңыртыла, яҡтыртыу системаһы алыштырыла.
Парк видеокүҙәтеү, һыу эсеү өсөн ҡоролмалар менән йыһазландырыла, вай-фай эшләйәсәк. Бер һүҙ менән әйткәндә, проект авторҙары ҡала баҡсаһын заманса итеп үҙгәртергә теләй. Проект әле экспертизала, уның хаҡы яҡынса 600 миллион һум менән баһалана.
Өфөлә был парк 1867 йылда губернатор Сергей Ушаков башланғысы менән булдырылған. Төрлө йылдарҙа Ушаков, Ирек баҡсаһы, Ленин исемендәге, Александр Матросов исемендәге мәҙәниәт һәм ял үҙәк паркы атамаларын йөрөткән. Паркта ҡыҙылармеецтар һәм йәмәғәт вәкилдәре ерләнгән мемориал, Александр Матросовҡа һәм Арыҫлан Мөбәрәковҡа һәйкәлдәр, үҙәк аллеяла республика наградалары менән 4 гранит стелла урынлашҡан. Ҡала баҡсаһы уҙған быуаттың 80-се йылдарынан бирле капиталь төҙөкләндерелмәгән.
Рәмилә Исмәғилева