«Берҙәм ил – уңайлы мөхит». «Берҙәм Рәсәй» партияһының федераль проекты ағзалары Өфөнөң социаль һәм инженер объекттарында мөмкинлектәре сикләнгән граждандар өсөн уңайлыҡтарҙы тикшерҙе. «Дуҫлыҡ монументы» эргәһендәге ер аҫты үткәүеле, Ағиҙел яры, һыу судноларына рейд барышы хаҡында тулыраҡ БЮТ каналы хәбәрсеһе Гүзәл Борханова.
Дәүләт Йыйылышы – Ҡоролтай депутаты, паралимпия чемпионы Ирек Зарипов Ағиҙел ярында үткән барлыҡ спорт һәм ижтимағи сараларҙың уртаһында ҡайнай. Әммә уға ла коляска менән саралар майҙанына үтеү өсөн әллә күпме ҡаршылыҡтар аша үтергә тура килә
«Дуҫлыҡ монументы»ндағы күҙәтеү майҙанынан төшкән баҫҡыстарҙа дүрт метр һайын терәүҙәр торорға тейеш, өҫтәге майҙандан ҡарағанда плитәнең дә тигеҙлеге төрлө кимәлдә, ти, белгестәр.
«Дуҫлыҡ монументы» туҡталышында ер аҫты үткәүеленә ингән урында пандус үтеү өсөн юл кимәле бер сантиметрҙан артмаҫҡа тейеш. Ә ысынбарлыҡта беҙ был һандың күпкә юғары булыуын күрәбеҙ.
Пандустарҙан төшкән юлдарҙа сығыу, инеү өсөн геолокация билдәләре бөтөнләй юҡ. Мөмкинлектәре сикләнгән граждандар, коляскаһы этәүсе әсәләр нисек юл табырға тейеш? Был үткәүелдә аҙашып теплоходға йәки башҡа мәҙәни-спорт сараларына һуңға ҡалыуың да ихтимал.
Ағиҙелдә навигация асылыу менән мөмкинлектәре сикләнгән кешеләргә лә сәйәхәттәргә сығыу форсаты артты. Социаль-мәҙәни саралар ҙа башҡа йылдарҙағынан күберәк ойошторола башланы. «Йылына йөҙҙән ашыу инвалид коляскаһында йөрөгән граждандарға ситуацион ярҙам күрһәтеп, теплоходта ялға алып сығабыҙ», тип билдәләй йылғасылыҡта эшләүсе белгестәр.
Ағиҙелдәге йылға судноларының граждандарҙы хәүефһеҙ хеҙмәтләндереү, мөмкинлектәре сикләнгән граждандарға уңайлыҡтар булдырыу мәсьәләһен хәл итеү кимәлен прокуратура һәм күҙәтеү органдары ентекле тикшерә. Улар етешһеҙлектәрҙе асыҡлағандан һуң,тейешле тәҡдимдәр индереләсәк.
«Дуҫлыҡ монумен»ты юл аҫты үткәүелендә, Ағиҙел ярында, һыу буйлап сәйәхәткә юлланыусы судноларға үтеү юлдарында мөмкинлектәре сикләнгән граждандарға уңайлыҡтар юҡ кимәлендә. БЮТ телеканалы мәсьәләне хәл итеүҙе иғтибар үҙәгендә тотоп, даими яҡтыртып барасаҡ.
Гүзәл Борханова