Иҫегеҙгә төшөрәбеҙ, сара сиктәрендә күсмә медицина пункттары төрлө төбәк ауылдары буйлап хәрәкәт итә. Ойоштороусылар төпкөл ауылдарға сифатлы медицина еткереүҙе маҡсат итеп ҡуя. Бөгөн «Сәләмәтлек поезы» Кушнаренко районы Ҡарасайылға ауылында булды. БЮТ хәбәрсеһе Рәзилә Ғиниәтуллина дауам итә.
Хаҡлы ялдағы Лиза Миронова оҙаҡ йылдар уҡытыусы булып эшләгән. Әммә бер йыл элек йөрәк эшмәкәрлегенә зарлана башлау сәбәпле, уға уҡытыуҙан китергә тура килә. Күсмә медицина пункты белгесе пенсионерға коронография үтергә тәҡдим итә. Ханыма Республика кардиология үҙәгенә йүнәлтмә бирелә.
Кардиолог хеҙмәтенә ауылда ихтыяж ҙур. ЭКГ аппараты булһа ла, һөҙөмтәләрҙе шифрлаусы белгес юҡ. Урындағы дауаханала флюорогра́фия менән маммогра́фия аппараттарына ла ҡытлыҡ бар. Ауылда йәшәүселәр күсмә тикшеренеү мөмкинлеге тыуҙырған акцияның уңайлығын юғары баһалай.
«Сәләмәт төбәк – сәләмәт республика» акцияһы апрелдә Башҡортостан башлығы башланғысы менән старт алғайны. Бөгөнгә тиклем белгестәр 70 меңдән ашыу пациентҡа юғары квалификациялы медицина ярҙамы күрһәткән.
Күсмә медицина хеҙмәте алдан билдәләнгән график буйынса эшләй. Уның менән республиканың Һаулыҡ һаҡлау министрлығы сайтында танышырға мөмкин. Табиптар бригадаһы составына хирург, гинеколог, онколог, офтальмолог һәм башҡа йүнәлештәге белгестәр инә. Медицина тикшеренеүен бушлай, сират тәртибендә үтергә мөмкин.
Мобиль медицина пункттары бөтә республика буйлап хәрәкәт итә. Йәмғеһе улар алтау. Өфө белгестәре тағы ла бер көн Ҡарасайылга ауылында булғандан һуң, Иҫке Туҡмаҡлыға юлланасаҡ.
Рәзилә Ғиниәтуллина