Был йүнәлештә тормошҡа ашырылған программа сиктәрендә инвесторҙарға сығымдарҙың бер өлөшө кире ҡайтарыла, башҡа льготалар ҙа ҡаралған.
Әлеге ваҡытта республиканың Сауҙа һәм хеҙмәттәр министрлығы 80-дән ашыу юл буйы сервисы объекттарын төҙөү менән мәшғүл. Тулыраҡ БЮТ хәбәрсеһе Рәзилә Ғиниәтуллина яҙмаһында.
Әлеге ваҡытта бында биналар юҡ. Ҡеүәтле техника тупраҡ ташый, ер тигеҙләнә. Коммуникация соҡорҙары ҡаҙыла. Буласаҡ биналар майҙаны билдәләнгән, нигеҙ өсөн траншеялар ҡаҙылған.
Бер йыл эсендә бында майҙанда заманса кафе, 40 номерға иҫәпләнгән ҡунаҡхана, заправка, тәгәрмәстәрҙе ремонтлау үҙәге, хатта балалар майҙансығы барлыҡҡа киләсәк. Оҙаҡламай күрше участкала ла төҙөү эштәре башланыр, тип көтөлә. Бындағы заправка газ яғыулығын файҙаланыусы транспорттарҙы хеҙмәтләндерәсәк.
Бында ҡунаҡтарҙы яғымлы хеҙмәтләндереүҙән тыш, өйҙәгесә бешерелгән ашамлыҡтар йәлеп итә. Оҙайлы юлдан һуң ялға туҡтаған водителдәр өсөн был иң мөһиме. Менюҙа милли ризыҡтар, хатта, бишбармаҡ бар. «Башҡортостан» кафеһы 15 урынға иҫәпләнгән. Бында ғибәҙәт ҡылыу бүлмәһе, инвалидтар өсөн айырым бәҙрәф эшләй.
М-5 «Урал» федераль трассаһында урынлашҡан был объект - республикала тәүге модулле юл буйы кафеһы. Капиталь төҙөлөштән айырмалы, объект ҡыҫҡа ваҡытта булдырыла, бынан тыш, ул мобиль, йәғни уны һүтеп күсерергә мөмкин. Бер нисә айҙан ошондай уҡ модулле кафе Бөрө трассаһында барлыҡҡа килер, тип көтөлә.
Программала ҡатнашыусы инвесторҙар өсөн айырым льготалар ҡаралған. Ер торг ойошторолмай ҡуртымға бирелә, һалым льготалары, коммуникациялар төҙөлөшөнә утыҙ миллион һумғаса субсидиялар бүленә.
Бөгөн был йүнәлешкә 10 миллиард һумға яҡын аҡса йәлеп ителер тип көтөлә. Таҙалыҡҡа, сифатлы туҡланыу һәм юғары сервисҡа - ресубликала ихтыяж ҙур. Уларҙың кимәлен күтәреү туристар артыуын да күҙаллай.
Рәзилә Ғиниәтуллина