Күпме электр энергияһын сарыф итәһең – шунса түләйһең

Подписывайтесь на Bash.News

Иглин районындағы «Шишмә» баҡсасылар ширҡәтендә һәр участка иҫәпләү ҡоролмаһы менән тәьмин ителгән. Территориаль селтәр органына күсеү менән трансформаторҙар ҙа даими яңыртыла башлаған. Биләмәләге ыңғай үҙгәрештәр менән БЮТ хәбәрсеһе Гөлназ Хәйбуллина таныштыра.

Иглин районының «Шишмә» баҡсасылар ширҡәтендә алты йөҙгә яҡын участка иҫәпләнә, һәр береһе электр энергияһын иҫәпләүсе ҡоролма менән тәьмин ителгән. Йорт хужалары ресурс менән тәьмин итеүсе компания менән тура килешеүҙәр төҙөп, сарыф ителгән киловаттар өсөн генә түләй башлаған.

Быға тиклем беҙҙең баҡсасылар ширҡәтендә йәшәүселәр өсөн дөйөм бер иҫәп булды. Берәүҙәр түләмәй, икенселәр электр энергияһын урлай торғайны. Шуға шәхси иҫәпкә күсеүҙе көтөп алдыҡ, бик уңайлы, үҙең өсөн генә яуаплыһың. Ваҡытында түләп барғас, бер ниндәй пеня, штрафы ла килмәй.
Екатерина Сабирйәнова, «Шишмә» баҡсасылар ширҡәтендә йәшәүсе

2020 йылда тап был баҡсасылар ширҡәте юридик шәхес булараҡ ҡулланылған ресурстар өсөн электр энергияһы менән тәьмин итеүсе компанияға һигеҙ миллион ярым һум аҡса бурыслы булған. Һөҙөмтәлә участкалар утһыҙ ҡала.

Муниципалитет менән берлектә шәхси иҫәптәр асыу буйынса Башҡортостан Хөкүмәтенә мөрәжәғәт ебәрелә. Бурысты ябыу шарты менән урындағы халыҡҡа проблеманы хәл итеү юлы билдәләнә. Инженер коммуникация электр энергияһын тапшырыу буйынса хеҙмәттәр күрһәтеүсе компанияға һатыла. Ойошма үҙ сиратында һәр участкаға иҫәпләү ҡорамалдары ҡуя.

Сифатһыҙ көсөргәнеш, селтәрҙәге авария хәлдәр төп проблема булараҡ билдәләнде. Район хакимиәте, ширҡәт етәкселеге, ресурс менән тәьмин итеүсе компания менән берлектә ҙур эш башҡарылды. Баҡсасылар хәҙер өҙлөкһөҙ рәүештә электр энергияһы менән тәьмин ителә, дөрөҫ иҫәп тә алып барыла.
Александр Нусенкис, «Гип-электро» компанияһы етәксеһе

Биләмә тиҙ үҫешә, яңынан-яңы йорттар ҡалҡа. Электр энергияһын тапшырыу буйынса хеҙмәттәр күрһәтеүсе компания селтәрҙәр һуҙыу, транформаторҙарҙы яңыртыу, ҡеүәттәрҙе арттырыу буйынса ла һөҙөмтәле эш алып бара.

Иглин районындағы «Шишмә» баҡсасылар ширҡәтенә илткән юлда - хәҙер асфальт. Өс йөҙ метр участкала төҙөкләндереү эштәре быйыл август аҙағында тамамланған. Ремонт барышында яҡындағы автобус туҡталышы ла яңыртылған.

Был эштәр ҙә республика ярҙамы менән башҡарылған. Быйыл Радий Хәбиров ҡушыуы буйынса республика баҡсасылар ширҡәттәрендә электр менән тәьминәт мәсьәләһен хәл итеү, юл инфраструктураһын яҡшыртыуға ҡаҙнанан йөҙ миллион һум аҡса йүнәлтелгәйне. Күләмле төҙөкләндереү эштәренә старт апрелдә үткән «Смарт-баҡсасы»форумында бирелгәйне.

Быйыл республикала тәүге баҡсасылар форумы үтте. Күләмле сара сиктәрендә төбәк етәкселеге тарафынан баҡсасылар ширҡәттәренә күрһәтеләсәк ярҙам саралары билдәләнде. Һыу менән тәьминәт системаһын, яҡтыртыу ҡорамалдарын яңыртыу, юлдарҙы ремонтлау буйынса ун бер заявка ебәрҙек. Финанстарҙы йәлеп итеү буйынса һөҙөмтәле эшләйбеҙ.
Андрей Коннов, Иглин районы хакимиәте башлығының ауыл хужалығы һәм ер-мөлкәт мөнәсәбәттәре буйынса беренсе урынбаҫары

Башҡортостан башлығына был йүнәлештәге эште шәхси контролендә тотҡаны өсөн оло рәхмәтлебеҙ. Радий Хәбиров – республика кимәлендә баҡсасылар ширҡәттәренә иғтибар йүнәлткән тәүге етәксе. Берләшмәләрҙәге мәсьәләләрҙе оператив хәл итеү маҡсатында Башҡортостан Хөкүмәте ҡарамағында эшсе төркөм дә булдырылды.
Дмитрий Караваев «Шишмә» баҡсасылар ширҡәте рәйесе, Башҡортостан баҡсасылары ассоциацияһы ағзаһы

Төбәктә баҡсасылыҡ менән шөғөлләнеүселәрҙең артыуы күҙәтелә, ширҡәттәрҙең һаны ғына мең ярымға еткән. Шуға күрә урындарҙа инженер селтәрҙәр, инфраструктураны яҡшыртыу көнүҙәк мәсьәләләрҙең береһе булып ҡала.

Гөлназ Хәйбуллина