Рус-швед һәм 1812 йылғы Ватан һуғышында ҡатнашҡан башҡорттарға арналған анимация фильмында ролдәрҙе сәхнә йондоҙҙары башҡара. Персонаждар Нәзифә Ҡадырова, Радик Юлъякшин, Иҙрис Ғәзиев, Фидан Ғафаров һәм Азамат Ғафаров тауышы менән һөйләшә. Ижади төркөмгә шулай уҡ LUMEN төркөмө артистары ингән. Рәссам Камил Буҙыҡаев башҡарған роль дә бар. Йәнһүрәт геройҙары башҡорт һәм рус телдәрендә аралаша. “Муха” студияһынан хәбәр итеүҙәренсә, “Төньяҡ амурҙары” йәнһүрәтенең премьераһы быйыл декабрҙә була.