Башҡорт дәүләт университеты ғалимдары дарыуҙарҙың “файҙалы” һәм “зарарлы” молекулаларын асыҡлау буйынса өр-яңы методика тәҡдим итә. Ул молекулаларҙың файҙалылығын баһалау буйынса теоретик прогноз яһауҙы аңлата. Теманы БЮТ хәбәрсеһе Әлфинә Килдейәрова дауам итә.
Тикшереү үҙәгендә төрлө БАД һәм дауалау препараттары. Дарыуҙың ауырлығына ҡарап һыу ҡушыла һәм өс электрод тоташтырылған һауытҡа күсерелә. Тикшереүҙә иң мөһиме - яҡшы модификатор һайлау. Электрод менән реакцияға инеп, уның һиҙеүсәнлеге арта.
Йылдан-йыл фармацевтика баҙары «файҙалы» молекулалар менән байытылған яңы препараттар менән тулылана. Уларҙың сифатын тиҙ арала тикшереү өсөн арзан ысулдар уйлап табыу мөһим. Башҡорт дәүләт университеты ғалимдары тап электрохимик анализ методы иң ҡулайлыһы тигән фекерҙә.
Башҡорт дәүләт университеты ғалимдары был өлкәлә 6 йыл шөғөлләнә, “файҙалы” һәм “зарарлы” молекулаларҙы асыҡлау буйынса фәнни мәҡәләләр ҙә донъя күрә. Дөйөм тырышлыҡ быға тиклем билдәле булмаған иң яҡшы модификаторҙы һайлау стратегияһын уйлап табырға мөмөкинлек бирә. Тикшереүҙәр өсөн препараттарҙы һайлауға айырыуса иғтибар бүленә.
Ғалимдар был асыш менән генә туҡтап ҡалырға уйламай. Киләсәктә улар модификаторҙарҙың төрлөлөгөн тикшерергә һәм әлеге моделде киңәйтергә иҫәпләй.
Әлфинә Килдейәрова