Тәжрибә туплау өсөн «Айыҡ ауыл» республика конкурсында ҡатнашыусы ауылдар һайланған. Район буйлап күсмә медицина модуле лә йөрөй.
Үрге Ласынтау медпунктында бөгөн алма төшөрлөк тә урын юҡ. Ауылда йәшәүселәр диспансер тикшереү үтергә килгән. Аҡ халатлылар уларҙан да күберәк. Бер кабинетта үҙәк район дауаханаһының күсмә модуле белгестәре эшләй, икенсе бүлмәлә студенттар ҡан баҫымы, ҡандағы кислород күләмен үлсәргә өйрәнә. Бөрө медицина һәм фармацевтика колледжы студенттары производство практикаһында.
Бер үҙе өс ауылды хеҙмәтләндергән фельдшер өсөн тотош ике бригада килеүе һиҙелерлек ярҙам.
Өлкәндәр өсөн дә уңайлы. Медицина тикшереүе үтер өсөн район үҙәгенә барып йөрөйһө түгел.
Анализдар тапшырырға, электрокардиограмма эшләтергә була. Флюроография кабинеты ла бар. Ул тәгәрмәс өҫтөндә. Колледж студенттарының практикаһы ике аҙна дауам итһә, күсмә модуль иһә йыл аҙағынаса Бөрө районының бөтә ауылдарына ла барып етәсәк.
Рәмилә Исмәғилева