Өфө – Абдулла маршруты буйынса тиҙ йөрөшлө ҡала яны поезына бәхетле билетты Татьяна Котова һатып алған.
Өс миллионынсы пассажирҙы Куйбышев тимер юлы, Башҡортостандың Транспорт һәм юл хужалығы министрлығы, «Башҡортостан ҡала яны пассажирҙар компанияһы» вәкилдәре ҡотланы. Татьяна Котоваға “Көнбайыш экспресс” маршрутында бушлай йөрөү мөмкинлеге биргән таныҡлыҡ һәм иҫтәлекле бүләктәр тапшырылды.
Былтырғыға ҡарағанда, быйыл ҡала яны тимер юл транспорты менән файҙаланған өс миллионынсы пассажир кимәленә ике айға иртәрәк барып еткәндәр. 2022 йыл статистикаһы күрһәтеүенсә, пассажирҙар тимер юлы транспортын өҫтөн күрә, сөнки уңайлылыҡ, тиҙлек, хәүефһеҙлек йәһәтенән күсмә состав иң юғары талаптарға яуап бирә. Республикала пассажирҙар ағымының дүрттән бер өлөшө тиҙ йөрөшлө «Орлан» һәм «Ҡарлуғас» ҡала яны поездары иҫәбенә тура килә.
Әлфинә Килдейәрова