Шаран районы Ерекле ауылында «Кесе Ватандың хоҡуҡи мәҙәниәте» проекты буйынса граждандарҙы ҡабул итеү ойошторолдо. Проекттың маҡсаты алыҫ биләмәләрҙә йәшәүселәргә бушлай хоҡуҡи ярҙам күрһәтеү һәм профилле министрлыҡ һәм ведомство белгестәренән консультация ойоштороу.
Бындай ҡабул итеүҙәр граждандарға район үҙәгенә килмәй генә йәшәгән ерҙәрендә үҙҙәрен борсоған мәсьәләләрҙе хәл итеү мөмкинлеге бирә. Дәүләт Йыйылышы - Ҡоролтай депутаттары, район етәкселеге, «Ғаилә» хеҙмәте, район мәшғүллек үҙәге һәм башҡа ойошмалар һәм ведомстволар вәкилдәре ҡатнашлығында үткән осрашыу был юлы ла маҡсатына иреште.
Проектты ойоштороусылар Абдуллин исемендәге мәктәп миҫалында төбәктә мәғариф тармағын яңыртыу программаһы үтәлеше менән дә танышты. Белем усағында программа буйынса капиталь ремонт башҡарылған, уның тирә-яғы төҙөкләндерелгән. Киләһе йыл районда тағы ла 4 мәктәпте яңыртыу ҡарала. Ошо уҡ көндө власть вәкилдәре Ҡортлокүл ауылында булып, унда 65 йыл бергә ғүмер иткән Ибаевтар ғаиләһен тәбрикләне. 5 бала тәрбиәләгән, 16 ейән-ейәнсәре һәм бүләсәре булған ғаилә парының тормошо күптәргә өлгө.