Унда килеүселәр өсөн көн һайын бай ял программаһы ойошторолдо. Былтыр йәй асылған үҙәктә 20 меңдән ашыу турист булған. Музейҙан БЮТ хәбәрсеһе Рәмилә Исмәғилева яҙмаһы.
Мәмерйәлә йыл әйләнәһенә 7-8 градус йылы һаҡлана. Кеше күпләп инһә, температура күтәрелә, шуның өсөн төпкө залдар туристар өсөн ябыҡ. Тау ҡыуышлығы мониторинг системаһына тоташтырылған - датчиктар - тикшереү ҡорамалдары ҡуйылған. Музей комплексында уның менән танышырға мөмкин.
Үҙәк тереклек хасил булыуҙың бар этаптарын үҙ эсенә ала. Ғалимдар фаразлауынса, мәмерйәләге һүрәттәр 16 -20 мең йыл элек төшөрөлгән.
Тикшеренеүҙәр күрһәтеүенсә, боронғо кешеләр һүрәттәрҙе 20 төҫлө буяу менән эшләгән. Музей лабораторияһында хеҙмәткәрҙәр уның 16 төрөн сығарыуға ирешкән. Охра өсөн ҡурсаулыҡтағы һоро һәм ҡыҙыл тимерташтар, һәм аргилит ҡыҙыу мейестә яндырыла. Таш быуат кешеләре онтаҡты ниндәйҙер йәнлек майы менән ҡатыштырғаны билдәле.
Ғалимдар фекеренсә, мәмерйәнең серҙәре әле тулыһынса асылып бөтмәгән. Таш быуат дәүерендә йәшәүселәрҙең мәҙәниәтен өйрәнеү дауам итә.
Рәмилә Исмәғилева