Бөгөн Республика Башлығы Радий Хәбиров Башҡортостандың беренсе Президенты Мортаза Ғөбәйҙулла улы Рәхимовты ерләү сараларын ойоштороу буйынса дәүләт комиссияһы ултырышын уҙғарҙы. - 11 ғинуарҙа, кисен Мортаза Ғөбәйҙулла улы Рәхимов вафат булды. Башҡорт халҡының бөйөк улы бар ғүмерен республика һәм Рәсәйгә хеҙмәт итеүгә бағышланы, - тине Радий Хәбиров. Мортаза Рәхимов менән хушлашыу иртәгә Өфөлә, "Башҡортостан" дәүләт концерт залында була. Иртәнге 9-ҙан 12-гә тиклем беренсе Президент менән теләгән һәр кеше хушлаша ала. 12-лә матәм митингы башлана. Хушлашыу сараһын тура эфирҙа Башҡортостандың төп телеканалдарында сәғәт 11-ҙән ҡарарға мөмкин. Мортаза Рәхимов Өфөлә, Мосолман зыяратында ерләнә.