Әмәлиәт Мәскәү белгестәре ҡатнашлығында үтте. Улар шулай уҡ балаларҙың ата-әсәләре менән осрашып, дауахананың паллиатив бүлегендә эшләүсе медицина хеҙмәткәрҙәре менән тәжрибә уртаҡлашты. Оҫталыҡ дәрестәре Өфөнөң 17-се ҡала балалар клиник дауаханаһында үтте. БЮТ хәбәрсеһе Азат Ғәлиуллин дауам итә.
Ольга Левчук ҡурсаҡ ярҙамында Мәскәү белгестәре өйрәткән алымдарҙы үҙләштерә. Өс йыл самаһы сабыйын зонд ярҙамында туҡландырғандан һуң, бөгөн ата-әсә ҡатмарлы процедураға ризалашҡан. Бала операция өҫтәлендә булған арала ул педиатрҙарҙан файҙалы кәңәштәр алды.
Паллиатив бүлектәге балаға бөгөн сираттағы операция эшләнде. Ул бүлектең бар медицина персоналы ҡатнашлығында, федераль үҙәк белгестәре күҙәтеүендә барҙы.
Гастростома, йә иһә ашҡаҙан һәм ҡорһаҡ ҡыуышлығын тоташтырған яһалма ярыҡ аша туҡландырыу зондтан ҡарағанда күпкә отошлораҡ. Хәлде күпкә еңеләйтә. Бөгөн республикала паллиатив пациенттар һаны 400-ҙән ашыу иҫәпләнә.
Әйткәндәй, былтыр Өфөнөң 17-се ҡала клиник дауаханаһында 6 балаға ошондай операция эшләнгән. Яҡын көндәрҙә тағы ла бер-нисә әмәлиәт үткәреү ҡаралған.
Азат Ғәлиуллин