Сәхнәлә ауыл халҡы. Мәжит Ғафури исемендәге Башҡорт дәүләт академия драма театры тамашасы хөкөмөнә йәнә бер яңы спектакль әҙерләй. Ижади коллектив былтыр Йылайыр районына театр-фольклор экспедицияһы сиктәрендә тормошҡа ашырылған документаль әҫәр сәхнәләштерәсәк. Уның эстәлегендә ауыл халҡы. Әҫәр һөйләш, диалект, ҡыланыштарға тиклем бөгөнгө көн мәсьәләләре күҙ алдына баҫтыра. Премьера әҙерлек һыҙығында. БЮТ хәбәрсеһе Азат Ғәлиуллин дауам итә.
Театрҙың тегеү цехында эштең тынғаны юҡ. Бында хеҙмәткәрҙәр бер юлы бер нисә спектакль өсөн сәхнә кейемдәре тегә. Бер өҫтәлдә апрелдә көтөләсәк әҫәргә билдәләнгән эскиздарға тауар-материалдар һайланһа, икенсеһендә яҡын көндәрҙә сәхнәләштереләсәгенә костюмдар теүәлләнә. Башҡортостандың атҡаҙанған артисы Милена Сираева цехҡа тәүгә генә килмәй.
Ә премьера ябайҙан түгел. Башҡорт театры былтыр Йылайыр районына экспедицияға барып күләмле әҫәр эшләүгә өлгәште. Режиссер-педагог Рима Харисова һәм проекттың шеф-драматургы Сәрүәр Сурина етәкселегендә актерҙар төбәктең 17 ауылын урап сыҡты.
Театр-фольклор экспедицияһы 2016 йылдан тормошҡа ашырыла. Һәр сәфәр айырым тематикаға һәм йүнәлешкә ҡоролған, экспедиция йомғаҡтары буйынса проект командаһы спектаклде вербатим технологияһын тәҡдим итә. Премьера 16 мартҡа билдәләнгән.
Азат Ғәлиуллин