Стәрлетамаҡ дәүләт театр-концерт берләшмәһенең Илшат Йомағолов исемендәге Башҡорт драма театры сәхнәһендә Айгөл Зөбәйҙуллинаның бенефисы үтте. Актрисаның юбилей кисәһе уңайынан Михаил Задорновтың «Килдең, киттең - хуш байғош» исемле лирик комедияһы күрһәтелде. Ике бүлектән торған тамашала ижадсыға ҡотлау һүҙҙәре лә еткерелде. Айгөл Зөбәйҙуллина башҡорт театрына 30 йылдан ашыу ғүмерен арнаған.
Тамашасы уны спектаклдәрҙә уйнаған ролдәре менән бергә, бейеү, концерт номерҙары аша ла танып белә. Заманында ул башҡарған сағыу ролдәрҙе Төркмәнстан, Әзербайжан, Үзбәкстан, Ҡаҙағстан тамашасылары ла алҡышлаған. Актриса бөгөн дә илһамланып ижад итә. Ул сәхнәлә өс тиҫтәнән ашыу образ тыуҙырған.