Өфөлә 267 уҡыусы хоҡуҡ фәне буйынса белемен һынай. Бөтә Рәсәй олимпиадаһының йомғаҡлау өлөшөн рәсми асыу тантанаһы «Йәшел сауҡалыҡ» шифаханаһында үтте. Илдең төрлө мөйөштәренән йыйылған үҫмерҙәрҙе Рәсәйҙең мәғариф, Башҡортостандың Фән һәм мәғариф министрҙары тәбрикләне.
Үҫмерҙәр алты көн дауамында үҙҙәренең әҙерлек кимәлен күрһәтәсәк. Олимпиада һынауҙары Башҡортостандың иң йәш юғары уҡыу йорто Өфө фән һәм технологиялар университетының хоҡуҡ инстититутында ойошторола. Еңеүселәрҙең һәм призерҙарҙың исеме 15 апрелдә «Башҡортостан» дәүләт концерт залында иғлан ителә.
Уҡыусылар яҙма, телдән турҙарҙа күнегеүҙәр эшләйәсәк. Олимпиадала ҡатнашыусылар бер-нисә дөрөҫ вариант һайлап хоҡуҡ буйынса тест һорауҙарына яуап яҙасаҡ, кроссворд һәм мәсьәләләр сисәсәк, тарихи хоуҡуҡи акттар һәм документтар анализлаясаҡ. Телдән турҙа халыҡ алдында сығыш яһағас, үҫмерҙәр тиҫтерҙәре һәм жюри ағзалары һорауҙарына яуап бирәсәк.
Уҡытыусы һәм остаз йылы сиктәрендә уҡытыусыларға лекциялар үткәреләсәк. Бынан тыш, Олимпиада хәрәкәтендә педагог-остаз квалификацияһын күтәреү курстары ойошторола.