Ойоштороусы булараҡ Стратегик башланғыстар агентлығы менән Рәсәй Конгресс Фонды сығыш яһай. Күләмле сарала ил үҫешенә тос өлөш индерәсәк башланғыстар һәм проекттар тәҡдим ителә. Улар халыҡтан махсус платформала туплана. Идеялар социаль, технологик, кадрҙар, экология, эшҡыуарлыҡ һәм һанлы сервистар йүнәлештәре буйынса йыйыла. Заявкалар 26 апрелгә тиклем ҡабул ителә, иң яҡшы тип танылғандары дәүләт ярҙамы аласаҡ.
Билдәле булыуынса, былтыр Башҡортостанда йәшәүселәрҙән 249 идея ебәрелгән, уларҙың тиҫтәнән ашыуы Топ-исемлеккә индерелгән. Быйыл төбәктә мең башланғыс йыйыу маҡсаты ҡуйылған. Башҡортостан Хөкүмәте ҡарарына ярашлы, муниципаль, республика кимәлендә әһәмиәтле проекттарҙы эҙләү һәм хуплау буйынса киң күләмле кампания үтә. Махсус ойоштороу комитеты координация эше менән шөғөлләнә. Проект авторҙарына эксперттар алдан баһалама биреп, методик ярҙам күрһәтә. Әйтәйек, был аҙнала «Минең бизнес» үҙәгендә эшҡыуарҙарға идеялар генерацияһы буйынса форсайт-сессия уҙғарылды.