Бөгөн Башҡортостан Башлығы Радий Хәбиров Рәсәй һәм Беларусь төбәктәренең унынсы форумына әҙерләнеү һәм уны үткәреү буйынса төбәк ойоштороу комитеты ултырышын үткәрҙе. Ул Өфөлә 26-28 июндә уҙа. Форум - ҡатнашыусылар һаны һәм дөйөм әһәмиәте буйынса иң ҙур сараларҙың береһе, - тип билдәләне Радий Хәбиров.
Ултырышта ҡатнашыусылар эшлекле программаны, делегациялар составын, шулай уҡ ваҡиға майҙансыҡтарын әҙерләүҙе тикшерҙе. Форумдың көн тәртибенә Рәсәй һәм Белоруссия төбәктәре араһында иҡтисади, социаль һәм гуманитар хеҙмәттәшлек мәсьәләләре инде. Форумға бөтәһе өс меңдән ашыу делегат килеүе көтөлә. Эшлекле программа менән бер рәттән киң мәҙәни программа ла планлаштырыла.
Рәсәйҙең һәм Белоруссияның популяр йырсы, музыканттары һәм ижади коллективтары «Евразия йөрәгендә Славян баҙары», «Ҡурай-фест», «Этно-төн» һәм «Симфоник төн» концерттарында сығыш яһаясаҡ. Программала Зәки Вәлиди урамында асыласаҡ «Дуҫлыҡ урамы» этник мәҙәниәттәр фестивале айырым урын биләйәсәк. Бында төбәктәрҙең халыҡ ихаталарын ойоштороу ҡарала. Шулай уҡ «Халыҡтар дуҫлығы» гастрономия байрамында Рәсәй менән Белоруссияның милли ризыҡтары тәҡдим ителәсәк. Эш кәңәшмәһендә ҡатнашыусылар форум сараларының хәүефһеҙлеге, транспорт һәм медицина тәьминәте мәсьәләләрен дә тикшерҙе.