Йәйге селләлә ҡышты хәстәрләп. Йылылыҡ селтәрҙәре компаниялары өсөн әле эштең иң ҡыҙыу мәле - торбалар алмаштырыла, коммуникациялар төҙөкләндерелә. Һыуыҡ миҙгелде аварияһыҙ сығыу өсөн белгестәр бөгөн көс һала. Өфөнөң Зорге һәм Әй урамдарында иртәнән кискә тиклем капиталь ремонт эштәре бара. Элекке тимер торбалар заманса пенополиуретан изоляция менән алмаштырыла. Капиталь ремонт 30 сентябргә тиклем дауам итә. Был магистраль 282 объектты йылы менән тәьмин итә.
Аҙаҡҡы тапҡыр был участкта ремонт эштәре 1988 йылда үткәрелгән. Элекке тимер торбаларҙы пенополиуретан изоляцияһы менән алмаштыралар. Уларҙың хеҙмәт итеү ваҡыты 30 йылдан да кәм түгел. Иң мөһиме, капиталь ремонт ваҡытында эҫе һәм һыуыҡ һыуҙы ҡапламайзар.
Йылылыҡ трассалары хәҙер «аҡыллы» торбаларҙан яһала. Тимергә ҡарағанда пенополиуретан менән изоляцияланған торбалар бер нисә өҫтөнлөккә эйә. Иң мөһиме улар оҙайлы файҙаланыуға иҫәпләнгән. Селтәрҙә авария тыуһа йәки йылы юғалыу күҙәтелһә, шунда уҡ сигнал килә.
Коммуналь инфраструктураны яңыртыу эштәре тотош республика буйынса алып барыла. Һуңғы йылдарҙа йыш ҡына авариялар күҙәтелгән Белорет районы йылылыҡ трассаһында ла 300 миллион һумға ремонт үткәреләсәк. Бер үк ваҡытта ҡаҙанлыҡтар ҙа ремонтлана.
Селтәрҙәрҙең киң структураһын иҫәпкә алып, һәр участок айырым иғтибар талап итә. Был саралар ҡышҡы һыуыҡта йорттарҙы өҙөклөкһөҙ йылытыуҙы маҡсат итеп ҡуя.
Йылытыу миҙгеленә әҙерлек эштәре экваторға яҡынлашты. Республика 15 сентябрҙә үк ҡышҡы йылытыуға әҙер булырға тейеш.
Илүзә Вәлитова