Сәфәрҙең маҡсаты - республиканың халыҡты социаль яҡлау һәм хеҙмәтләндереү өлкәһендәге алдынғы тәжрибәһе менән танышыу. Улар Стәрлебаш районында эшләп килгән Күмертау Балалар һәм үҫмерҙәр өсөн реабилитация үҙәге филиалында булды. БЮТ хәбәрсеһе Әлфинә Килдейәрова дауам итә.
Был бинаның 1986 йылда файҙаланыуға тапшырылып ошоға тиклем поликлиника булып хеҙмәт итеүенә ышаныуы ауыр, ул заманса стандарттар буйынса яңынан төҙөлгән кеүек тойола. Капиталь ремонт республика Башлығы Радий Хәбиров ҡушыуы буйынса башҡарылған. Әммә бина яңыртып ҡына ҡалынмаған, яңы реабилитация ҡорамалдары,мебель дә килтерелгән.
Реабилитация үҙәге быға тиклем Стәрлебаш ауылының ситендә урынлашҡан була. Яңыһы - район үҙәгенең төп социаль объекттары эргәһендә. Бында күрше Федоровка, Миәкә, Бишбүләк, Әлшәй, Ишембай райондары һәм Стәрлетамаҡ ҡалаһында йәшәүселәр дауаланыу үтә.
Теүәл бер йыл элек сафҡа ингән филиал эшмәкәрлеге менән Рәсәйҙең башҡа төбәктәре лә ҡыҙыҡһына. Ханты- Манси автоном округының социаль үҫеш департаменты хеҙмәткәрҙәре Башҡортостан тәжрибәһе менән яҡындан танышты.
Эш сәфәре барышында Ханты-Манси автоном округы делегацияһы республика халыҡты социаль хеҙмәтләндереү үҙәге менән дә танышҡан. Өфө хосписын барып күреү теләге лә бар.
Рәсәй төбәктәре менән тәжрибә уртаҡлашыу, башҡа субъекттар эшмәкәрлеге менән танышыу ике яҡ өсөн дә файҙалы. Проекттың маҡсаты ла бер - реабилитация үҙәктәрендә йәшәү кимәлен һәм сифатын күтәреү.
Әлфинә Килдейәрова