Бөгөн ярыштар баш ҡаланың 9 майҙанында үтте. 11 төр спорт уйындарында миҙал яулаусыларҙың тәүге исемлеге иғлан ителде. Улар хаҡында киләһе яҙмала.
«Рәсәй-1» һәм «Рәсәй-2» командалары араһында гандбол уйыны спортсыларҙан бигерәк, тренерҙарға көсөргәнешле булды. Еңеүгә ынтылыу ике тайм дауамында барҙы.
Спортсыларға тренерҙарҙы аңлау ҡайһы берҙә еңел түгел. Ул саҡта тәржемәселәр ярҙамға килә. Евгений Зотин Рәсәй йыйылмаһын 3 йыллап өйрәтә. Ошо ваҡыт эсендә команда Хорватияла үткән Европа чемпионатында ҡатнашып икенсе урын яулап өлгөрә. Йәйге уйындарҙың старт осрашыуҙарында 32-24 иҫәбе менән Зотин коллективы еңеүгә лайыҡ булды.
Грек-рим көрәшендә миҙалдар 8 кәүҙә ауырлығы буйынса уйнатылды. Иң көсөргәнешлеһе тип 67 килограмға тиклемге спортсылар осрашыуын билдәләргә мөмкин. Владимир ҡалаһынан Александр Пастушенко менән Татарстан исеменән сығыш яһаусы, Стәрлетамаҡ егете Исмаил Насрулаев төп миҙал эйәһе булыу өсөн һынау тотто. Ике спортсының дәрте келәмгә сыҡмаҫ элек «ҡайнай» ине. Һөҙөмтәлә уңыш Владимирҙан килгән уйынсыға йылмайҙы.
Бөгөн үткән сурдлимпия уйындары миҙалдарға бай булды. Төрлө илдән килгән спортсылар тәүге наградаларын алып ҡыуанды. Һөҙөмтәлә пьедесталды ике броза менән Ҡырғыҙстан вәкилдәре биләһә, Белоруссия һәм Үзбәкстан илдәре иҫәбендә берешәр миҙал. Велоспорт буйынса тик бер сит ил вәкиле генә сығыш яһаны. Таиландтан Шаронрен Шайват өсөн Өфө уйындарында ҡатнашыу еңелдән бирелмәне. Шуға ла финалға етә алманы.
Йөҙөү спорты буйынса ла тәүге миҙалдар уйнатылды. Виктория Терентьева алтын яулап, Сурдлимпия уйындарының етенсе тапҡыр чемпионы исеменә лайыҡ булды. Әстрхан өлкәһенән килгән замандашыбыҙҙы трибунанан ата-әсәһе лә ҡеүәтләне. Терентьевтар әйтеүенсә, ҡыҙының бер спорт ярышын да ҡалдырғаны юҡ. Тап яҡындарының терәк-таяныс булыуы ҡатнашыусыларҙы күптәрҙе алға, еңеүгә этәрә. Бөгөн уйындың икенсе көнө генә тамамланды. Алда көсөргәнешле, тағы ла ҡыҙыу осрашыуҙар көтөлә.
Азат Ғәлиуллин