Юбилей датаһы уңайынан ҡаланың Үҙәк майҙанында мәҙәни-спорт саралары үтте. Урындағы халыҡты республиканың билдәле артистары йыр-бейеүҙәре менән тәбрикләне, шулай уҡ биләмәлә төрлө милләт халыҡтарының ихаталары, халыҡ кәсептәре өлгөләре күргәҙмәһе эшләне, төрлө оҫталыҡ дәрестәре уҙғарылды. Сара сиктәрендә ике йөҙ килограммлыҡ «Ҡырмыҫҡа иләүе» торты ла бешерелде. Байрам ҡунаҡтары «Йондоҙ менән зарядка» акцияһында, велоуҙышта ҡатнашты.
Нефтекама ҡалаһында ойошторолған байрам сараһында Башҡортостан башлығы Хакимиәте етәксеһе Максим Забелин да ҡатнашты. Эш сәфәре барышында ул махсус хәрби операцияла ҡатнашыусылар һәм уларҙың ғаиләләренә ярҙам Үҙәгендә булды, Миңлеғәле Шайморатов исемендәге ирекмәндәр штабы ағзалары менән аралашты.