Мөхәббәт еңә. Стәрлетамаҡ районынан Олеся Спиридонова менән Владимир Денисов Ставрополдә үткән «Шишмәләр» Бөтә Рәсәй илһөйәрлек йыры конкурсында беренсе урынға лайыҡ булды. Уларҙың «Ишетәһеңме? « тип исемләнгән йыры халыҡ һөйөүен яулап, иң күп тауыш йыйҙы. Махсус хәрби операцияла ҡатнашыусылар һәм уларҙың ғаиләләренә арналған музыкаль композиция тураһында киләһе яҙма.
«Меңдәрсә саҡрым ара булыуға ҡарамаҫтан, йырымды ишетерһең, һөйөү доғалары һаҡлаһын һине»,-тип йырлай Олеся Спиридонова мобилизацияның тәүге көндәренән үк хәрби хеҙмәткә алынған тормош иптәшенә. Музыкаль композицияның һүҙҙәрен һәм көйөн ҡатын үҙе яҙған. Клип ғинуарҙа - Владимир Денисовтың тәүге ҡыҫҡа ваҡытлы отпускыға ҡайтҡан мәлендә төшөрөлгән.
«Ишетәһеңме» йырын тормош иптәше генә түгел, тотош ил халҡы ишетте. Ғаилә дуэтын социаль селтәрҙәрҙә генә миллионлап кеше ҡараған. Яңыраҡ Ставрополдә үткән «Шишмәләр» Бөтә Рәсәй илһөйәрлек йыры конкурсында яҡташтарыбыҙҙың еңеү яулауы ла халыҡ һөйөүе билдәһе. Бәйгегә барлығы ун ике меңдән ашыу заявка ебәрелгән булған, финалға 28 композиция үткән. Олеся Спиридонованың тырышлығын, сикһеҙ мөхәббәтен Рәсәйҙең халыҡ артисы Олег Газманов та маҡтап телгә алды.
Владимир Денисов ҡыҫҡа ваҡытлы отпускыға ҡайтарылған булған, бәйгелә уңышлы сығыш яһағандан һуң кире махсус хәрби операция биләмәһенә юлланған.
Олеся Спиридонованың тормош иптәше мобилизацияға тиклем Стәрлетамаҡ районы мәҙәниәт һарайында художество етәксеһе булып эшләгән. Ҡатын үҙе флорист.
Ставрополдә үткән «Шишмәләр» Бөтә Рәсәй илһөйәрлек йыры конкурсында иң күп тауыш биреүсе төбәк булараҡ Башҡортостан билдәләнде. Ойоштороусылар республика биләмәһендә ҙур концерт ойошторорға вәғәҙәләне
Гөлназ Хәйбуллина