Ваҡиға бөгөн иртән Ишембай районының Петровское ауылы үҙәгендә теркәлгән. Януарҙан зыян күреүсе үҙәк район дауаханаһына һалынған. Йома иртәһендәге көтөлмәгән хәл тураһында БЮТ хәбәрсеһе Рәмилә Исмәғилева әҙерләгән яҙмала.
Татьяна Могильникова иртән Петровское ауылының Кооператив урамы буйлап эшкә китеп барған. Көтмәгәндә уның ҡаршыһына айыу килеп сыҡҡан. Бер төркөм ир-егеттәр йыртҡысты ҡыуып өлгөрмәһә, ҡатындың айыу менән осрашыуы нисек тамамланыры билдәһеҙ. Газ хеҙмәте биргән кадрҙарҙа айыу балалары менән ауыл буйлап хәрәкәт итеүен күрергә мөмкин. Биналағы хеҙмәткәр күҙәтеү камералары аша айыуҙарҙы күреп ҡалған һәм башҡаларҙы иҫкәртеү өсөн урамға йүгергән.
Петровское ауылының үҙәк урамы буйлап мәктәпкә китеп барған уҡыусы ла йыртҡыс ҡорбаны була яҙған. Уны автомобиль хужаһы салонға ултыртып алған, айыуҙы сигнал менән ҡурҡытҡан.
Зыян күргән ҡатынға урындағы участка дауаханаһында тәүге медицина ярҙамы күрһәтелгән һәм ашығыс рәүештә Ишембай районының үҙәк район дауаханаһына оҙатылған. Көтмәгәндә йыртҡыс ҡорбаны була яҙған ханым үҙенә ярҙам итеүселәргә рәхмәтле.
Табиптар Татьяна Могильникованың хәлен уртаса ауырлыҡта тип баһалай. Киләһе ун көндө уға дауаханала үткәрергә тура киләсәк.
Һунар инспекторҙарына айыуҙы атып алырға тура килгән. Сөнки бындай хәлдә ҡырағай хайуан тирә-яҡтағыларға хәүеф тыуҙыра. Уның балалары Ишембай районы һунарсылар һәм балыҡсылар йәмғиәтенә тапшырылған.
Һуңғы ваҡытта айыуҙарҙың ҡала, ауылдарға килеүе йышайҙы. Уның сәбәптәре төрлө булыуы мөмкин. Әлеге осраҡта ла ваҡытында ярҙамға ташланыусылар булыуы ҙур бәләнән аралап ҡалған.
Рәмилә Исмәғилева