Күләмле сарала илебеҙҙең 56 төбәге, Белорусия, Абхазия делегациялары ҡатнашты. «Торатау» Конгресс-холында үткән йыйында «Йыл маршруты» Бөтә Рәсәй премияһы конкурсы еңеүселәре тәбрикләнде. Эколгия, энотуризм, һауыҡтырыу, йәштәр, сәнәғәт туризмы маршруттары буйынса иң яҡшы проекттар асыҡланды. Финалистар араһында эксперттар ете эште гран-при менән баһаланы. Еңеүселәр араһында Башҡортостан вәкилдәре лә бар.
«Йыл маршруты» Бөтә Рәсәй конкурсы туғыҙ йыл элек старт ала. Быйыл унда ҡатнашыу өсөн туроператорҙарҙан 571 ғариза ҡабул ителгән. Улар араһынан 268 туристик маршрут проекттары яҡланған. Башҡортостанда сәйәхәт итеү 48 маршрут буйынса үҫешә. Республикала этнотуризмды үҫтереүгә лә мөмкинлектәр киң. Ишембай районында урынлашҡан «Торатау» геопаркының «Изге Юрматы еренә рәхим итегеҙ» проекты авторҙары эше лә танылыу яуланы.