Хәрби бурысын үтәүселәрҙе ҡеүәтләп, Еңеүгә әйҙәү. Өфөнөң Октябрь районы махсус хәрби операция биләмәһенә сираттағы гуманитар ярҙам оҙатырға әҙерләй. Был юлы алғы һыҙыҡтағыларға транспорт өсөн кәрәк-яраҡтар, шулай уҡ яугирҙарҙың хәүефһеҙлеген тәьмин иткән әйберҙәр тәшкил итә.
Баш ҡаланың Октябрь районындағы автосалондарҙың береһе сираттағы ылау әҙерләй. Был юлы ул «Нива» машинаһы өсөн кәрәк-яраҡтарҙан тора. Шулай уҡ яғыулыҡ-майлау материалдары ла тупланған. Барыһы ла махсус хәрби операция ҡатнашыусылары һорауы буйынса йыйыла.
Яугирҙарға кәрәк-яраҡтар Өфөнөң Октябрь районы хакимиәтенә бергә тупланғас та, фураларға тейәләсәк. Изге эшкә ҡала халҡы ла, эре ойошма-предприятиелар ҙа берҙәй ҡушыла.
Нефть һәм газ сәнәғәтенең технологик компанияһы тарафынан шулай уҡ ярҙам тәүгә күрһәтелмәй. Был юлы предприятие етәкселеге бронежилет, балаклава, өҫкө йылы кейемдәр әҙерләгән.
Азат Ғәлиуллин