Чернухино ауылының Георгий Иващенко исемендәге Тыуған яҡты өйрәнеү халыҡ музейына 55 йыл тулыу айҡанлы уҙғарылған сарала Башҡортостан вәкилдәре лә ҡатнашты.
Музейҙа 112-се башҡорт кавалерия дивизияһына арналған экспозиция бар. 1943 йылдың февралендә Ворошиловград, хәҙерге Луганск ҡалаһын азат итеү бурысын үтәгәндә дивизия Чернухино ауыл биләмәһендә 7 көн була. Урындағы халыҡ яралыларҙы дауалай, яуҙа һәләк булғандарҙы туғандар ҡәберлегендә ерләй. Ауылда Шайморатов, Атлы дивизия, Кавалеристар урамдары ла бар. Музейҙа 112-се башҡорт атлы дивизияһына ҡағылышлы тарихи мәғлүмәттәр ҡәҙерләп һаҡлана. Юбилей уңайынан музейға Башҡортостандан китаптар бүләк ителде.