Медицина учреждениеһы эшмәкәрлеге менән бөгөн Башҡортостан башлығы яҡындан танышты. Поликлиника Киров районы балалары сәләмәтлеге һағында тора. Өфөлә уның 6 бүлексәһе эшләй, 7 -сеһе тиҙҙән Һынаусылар урамында сафҡа инергә тейеш. 40 меңдән ашыу пациент беркетелгән. Башҡортостан башлығы 2-се балалар поликлиникаһының Степан Кувыкин урамындағы филиалында булды. Ул табиптарҙың эш бүлмәләрен, процедура кабинетын, фтизиотерапия, рентген, функциональ диагностика һәм УЗИ бүлмәләрен ҡараны.
Поликлиника бүлексәһе тәүлегенә 300 баланы ҡабул итә. 2022 йылдан һаулыҡ һаҡлау учреждениеһында капиталь ремонтҡа әҙерлек башланған. Йылы һәм эҫе һыу селтәрен алмаштырыу, канализация һәм ҡыйыҡты яңыртыу күҙаллана. Төҙөкләндереү эштәренең хаҡы 6 миллиард 600 миллион һумға баһалана.
Өфө ҡалаһы 2-се балалар полклиникаһының Кувыкин урамындағы бүлексәһе 1983 йылда сафҡа индерелгән. Дауалау-диагностика ҡорамалдарына ҡытлыҡ юҡ. Заманса рентген аппараты, УЗИ тикшереүе ҡоролмаһы эшләй. Пациенттар билдәләүенсә, поликлиникала сират юҡ кимәлендә. Ауырыуҙар табипҡа ваҡытында эләгә. Медицина учреждениеһында эшләгән белгестәрҙең күбеһе бай хеҙмәт тәжрибәһе туплап өлгөргән. Улар үҫеп килгән быуындың сәләмәтлеген нығытыу, сирҙәрҙе иҫкәртеү өсөн бар көсөн һала. Медицина хеҙмәткәрҙәре лә поликлиникаға ремонт талап ителеүен йәшермәй.