Дәүләт наградаларын Башҡортостан башлығы хакимиәте етәксеһе Максим Забелин тапшырҙы. Яңы йыл алдынан дәүләт наградаһы менән бүләкләнеүселәр араһында ҙур медицина учреждениелары етәкселәре лә, табиптар ҙа, шәфҡәт туташтары ла, водителдәр ҙә бар. Һәр береһе үҙ һөнәренең оҫтаһы, тиҫтәләрсә йылдар дауамында халыҡ сәләмәтлеге һағында тора. Махсус хәрби операция башланғандан һуң күптәре Донбасҡа барып ерле халыҡҡа, яугирҙарыбыҙға медицина ярҙамы күрһтәкән. 2022 йылдан башлап Луганск һәм Донецк өлкәһенә Башҡортостандан 200-ҙән ашыу медицина хеҙмәткәре барып ҡайтҡан. Алыҫ сәфәргә 2-3 тапҡыр юлланыусылар ҙа бар.
Бүләкләнеүселәр әйтеүенсә, медицина хеҙмәткәрҙәренең төп бурысы - халыҡ сәләмәтлеге һағында тороу. Ә Донбасҡа командировкаларға килгәндә, әлбиттә, оҙайлы ваҡытҡа ғаиләне ҡалдырып китеү, сит ерҙә эшләү еңел түгел. Әммә ауыр хәлдә ҡалған кешеләргә ярҙам итергә кәрәк. Ерле кешеләрҙең йылы мөнәсәбәте, хөрмәт-ихтирамы ла көс-дәрт өҫтәй. Тәүлек әйләнәһенә, алһыҙ-ялһыҙ эшләгән саҡтар ҙа була, ти улар.