Яңылыҡ поликлиникалар өсөн дә, пациенттарға ла мотлаҡ. Электрон медицина карта гражданин беркетелгән һаулыҡ һаҡлау учреждениеһында ғаризаһыҙ тәртиптә асыла. Әммә пациенттар ҡағыҙ картаны һаҡлап ҡалырға хоҡуҡлы, бының өсөн поликлиника мөдире исеменә ғариза яҙырға кәрәк.
Электрон картаға электрон почта йәки «Дәүләт хеҙмәттәре» сайты аша инергә мөмкин. Яңы карта бөтә медицина учреждениеларында ҡулланыласаҡ. Бынан тыш, 2024 йылда мотлаҡ медицина страховкаһы буйынса яңы хеҙмәттәр күрһәтелә башлай. Мәҫәлән, исемлеккә даими медицина тикшереүҙәре һәм реабилитация, хроник сирлеләрҙе диспансер күҙәтеү, шулай уҡ психолог консультациялары инә.