Батырҙарға һағынышлы сәләм. Өфөнөң 97-се мәктәбе «Һалдатҡа хат» Бөтә Рәсәй акцияһына ҡушылды. Сара сиктәрендә балалар махсус хәрби операция ҡатнашыусыларына махсус посылкалар ҙа әҙерләгән. БЮТ хәбәрсеһе Азат Ғәлиуллин дауам итә.
Балалар яугирҙарға яҙған хат-сәләмен уҡый. «Һалдатҡа хат» Бөтә Рәсәй акцияһына Өфөнөң 97-се мәктәбенең икенсе класс уҡыусылары икенсегә ҡушыла. Сара ата-әсәләр менән берлектә тормошҡа ашырыла. Шуға ла хатҡа өҫтәп балалар махсус хәрби операцияла ҡатнашыусыларға кәрәкле әйберҙәр ҙә килтергән.
Улар ҙа яугирҙар һорауы буйынса тупланған. Хатта эт-бесәйҙәргә тиклем хәстәрлек күрелгән. Бөгөн балалар өйҙәренән буш консерва банкыларын килтереп, шулай уҡ йәшниктәргә тултырҙы.
Ғөмүмән, Өфөнөң 97-се мәктәбе бындай сараларҙа тәүгә ҡатнашмай. Изге эш хайуандар приютына ярҙам итеүҙән башлана. Артабан, улар «Беренселәр хәрәкәте» тип исемләнгән Бөтә Рәсәй ирекмәндәр хәрәкәтенә ҡушылып, үҙҙәрен төрлө акцияларҙа һынап ҡарай.
97-се мәктәптең икенсе класында тормошҡа ашырылған изге эшкә башҡа уҡыусылар ҙа ҡушыла. Улар ҙа Еңеүҙе яҡынайтыуға үҙ өлөшөн индерергә теләй. Кәрәкле әйберҙәр тупланғас, гуманитар ылау алҡы һыҙыҡҡа оҙатыласаҡ.
Азат Ғәлиуллин