Башҡортостандың IT-компаниялары «Һанлы технологиялар» проекты сиктәрендә йыл һайын йөҙҙәрсә миллион һумлыҡ грант ота. Аҡсалата ярҙам һанлы технология өлкәһендә эшләүсе ойошмаларҙы дәртләндереү, уларҙың идеяларын тормошҡа ашырыу өсөн йүнәлтелә. Былтыр республиканың өс IT-проекты федераль һөм төбәк бюджетынан 135 миллион һумлыҡ грант отто. Еңеүселәрҙең икеһе менән БЮТ ижади төркөм осрашты. IT-проекттарҙы тормошҡа ашырыу нисек бара? БЮТ хәбәрсеһе Әлфинә Килдейәрова дауам итә.
Өфөлә ултырып Мәскәүҙәге Внуков аэропортында сәйәхәт итеү. Ул ғына ла түгел, «СИТНебо» программа-аппарат комплексы башҡа һанлы симуляторҙар кеүек күсереп төшөрөлмәгән, ә тулыһынса яңынан эшләнгән. Шуға күрә, уның ысынбарлыҡҡа тап килеүенә шик юҡ. Әле программа тулыһынса тиерлек әҙер
Башҡортостандың IT-белгестәре төрлө объекттарҙа виртуаль сәйәхәт ҡылыу өсөн программалар яҙа. Аэропорттан тыш, Эрмитажды ла һанлы киңлеккә күсерә. Виртуаль ысынбарлыҡ тармағында эшләүсе «Скайс» ойошмаһы былтыр дәүләттән грант ярҙамы алған. Был сумма IT өлкәлә нығынып китер өсөн яҡшы булды, тип белдерә компания етәксеһе. Сөнки күпселек проекттар бер йыл тирәһе генә эшләп ярҙам алмағас, ябылырға мәжбүр була.
Был асыш иһә пилотһыҙ һауа суднолары менән идара итеүҙе камиллаштырыуға йүнәлтелгән. Бындай тәүге симулятор донъяла өсәү генә. Проектты Башҡортостан белгестәре Мәскәүҙәге ИНФОТЕХ, ВКО АВИАТЕХ һәм Томск дәүләт университеты менән берлектә эшләнгән.
Федераль грантҡа эйә булған киләһе проект лаборанттарға, клиник диагностика лабораторияларына ярҙам итәсәк. Машина күҙе микроорганизмдарҙың төрлө препараттарға һиҙгерлеген билдәләй ала. Был үҙ сиратында дауалауҙа ҡулланылған препараттарҙың организмға файҙалы йәки киреһенсә зыян килтереүен машина ярҙамында асыҡларға мөмкинлек бирәсәк.
IT-компанияларға ярҙам итеү һәм уларҙың потенциалын нығытыу өсөн былтыр ғына өс проект, йәмғеһе 135 миллион һумға грант отҡан.
Әлеге ваҡытта республикала аккредитацияланған 225 IT-компания эшләй. Уларҙың һәр береһе быйыл да үткәреләсәк гранттар конкурсында ҡатнашыу мөмкинлегенә эйә.
Әлфинә Килдейәрова