Объект Өфөнөң 450 йыллығы уңайынан һалынған мәғариф комплекстарының береһе булып тора. Тағы ла яңы мәктәптәр Дим районында һәм Затонда барлыҡҡа киләсәк. Төҙөлөш барышы тураһында БЮТ хәбәрсеһе Рәмилә Исмәғилева.
Эшселәр кирбес менән бинаның тәүге ҡатын һала башлаған. Бригадалар стеналарҙың нигеҙ һәм ҡаплау плиталарын монтажлай. Төҙөлөш майҙанында алтмышлап кеше эшләй.
Яңы мәктәп Рудольф Нуриев, Энтузиастар урамдары, Дәүләткилдеев бульвары һәм Салауат Юлаев проспекты менән сикләнгән кварталда урынлаша. Ер участкаһының майҙаны 3,2 гектар тәшкил итә. Әйтергә кәрәк, майҙан тау битләүенә тура килгәнлектән, архитекторҙарға байтак эш башҡарырға тура килгән.
Төҙөлөш «Прошкола» компанияһы менән концессия килешеүе сиктәрендә алып барыла.
Һуңғы йылдарҙа был биҫтәлә үҫеп сыҡҡан күп ҡатлы йорттарҙа, мәғлүмәт буйынса ун өс меңдән ашыу кеше йәшәй. Юл аша ғына көрәш үҙәге төҙөлә. Белем усағын быйыл йыл аҙағында файҙаланыуға тапшырыу күҙаллана. Төҙөлөштө ваҡытында тамамлау өсөн өҫтәмә эшселәр һәм техника менән көсәйтеү ҡарала.
Рәмилә Исмәғилева