Ул иртәгә билдәләнәсәк Рәсәй студенттар отряды көнө уңайынан ойошторолдо. «Торатау» конгресс-холы майҙанына баш ҡала вуздары һәм урта белем биреү учреждениелары студенттары йыйылды. Саранан БЮТ хәбәрсеһе Әлфинә Килдейәрова әҙерләгән яҙма.
Республика Рәсәй студенттар отряды көнөн бөгөн үк билдәләй. Йәштәр үҙ көсө менән ойошторған сара иң әүҙем ҡатнашыусыларҙы бүләкләү тантанаһынан башланды. Сулпан Таңғатарова өс йыл үҙе уҡыған университеттың педагогик отрядын етәкләй. Ошо ваҡыт эсендә тиҫтәләгән сарала ҡатнашып өлгөрә, һәр йәй лагерҙа вожатый булып эшләй.
Башҡортостанда Рәсәй студенттар отрядының ҙур төбәк бүлексәһе эшләй. Ул йөҙләгән кешене берләштерә. Өфөлә уҙғарылған форум башлыса эш эҙләүсе студенттарға тәғәйенләнде. Уларға республиканың эре компаниялары тарафынан оҫталыҡ дәрестәре ойошторолдо.
Йылдан-йыл Рәсәй студенттары отряды яңы ойошмалар менән дуҫлаша. Форум барышында Башҡортостандағы «Ростелеком» компанияһы менән дә килешеү төҙөлдө.
Иртәгә билдәләнәсәк Рәсәй студенттар стрядтары көнө - ул хеҙмәт байрамы, ти ойоштороусылар. Сөнки хеҙмәт - студенттар отрядында төп ҡиммәттәрҙең береһе.
Әлфинә Килдейәрова