Самбо, бокс, өҫтәл теннисы һәм башҡалар - урында йәшәүселәргә бер нисә спорт төрө менән шөғөлләнеү өсөн шарттар булдырылды. Ул ғына ла түгел, өҫтәп тағы ла бер майҙан булдырмаҡсылар. БЮТ хәбәрсеһе Рәзилә Ғиниәтуллина дауам итә.
Самбо төркөмө өсөн яңы бүлмәлә был беренсе күнекмә. Маттар, спорт кейеме - барыһы ла яңы. Бер төркөм үҫмер егеттәр менән көрәшеүсе нәзәкәтле ҡатын-ҡыҙҙы тренер тип әйтмәҫһең дә. Тик самбо буйынса спорт мастеры Елена Абдуллина ҡайһы саҡ ир-егеттәрҙән дә талапсаныраҡ.
Наил Хузин бында ҡустыһы менән шөғөлләнә. Самбо буйынса тәжрибәләре икеһенә бергә тиҫтә йылдан ашыу. Күнекмәләрҙе өйҙә лә ҡабатлайҙар. Йәштәре һәм ауырлыҡтары төрлө, әммә спортта көслөрәк көрәштәш менән алышыу - файҙалы алым. Өҫтәл теннисында кеүек. Бына, мәҫәлән, 7 йәшлек Александр Густов 17 йәшлек көрәштәшенә ҡаршы уйнай.
Физкультура комплексында ҙур спорт залы бар. Бында баскетбол, футбол, волейбол кеүек төрлө спорт төрҙәре буйынса ярыштар үткәреү күҙаллана. Сосораҡтар яңы залда беренсе еңеүен яулап өлгөргән дә инде.
Физкультура-спорт комплексында икенсе ауылдарҙан да шөғөлләнергә теләүселәр бар. Сәләмәтлеген балалар ғына түгел, өлкәндәр ҙә нығытырға ниәтләй.
Ауылда 2 мең тирәһе кеше йәшәй. Балалар һаны йылдан-йыл арта. Шуға ла спорт комплексы - көтөп алынған объект. Физкультура комплексы майҙанында пейнтбол яланы ла буласаҡ. Уның төҙөлөшө бер нисә айҙан башланасаҡ.
Рәзилә Ғиниәтуллина