Хәҙерге көндә Лондонда йәшәп ижад иткән яҡташыбыҙ, опера йырсыһы, Башҡортостандың атҡаҙанған артисы Айгөл Әхмәтшина оркестр менән «Һандуғас» башҡорт халыҡ йырын сығарған.
«Сәнғәткә юлым башҡорт халыҡ йырҙарынан башланды. Ә «Һандуғас» минең өсөн айырыуса әһәмиәткә эйә, сөнки ул миңә бала сағымды, өләсәйемдең йырлағанын иҫемә төшөрә. «Һандуғас» - йыр ғына түгел, ул тарих һәм мәҙәниәт символы, бының өсөн үҙенсәлекле башҡорт күлдәген һайланым. Һеҙгә оҡшар тип ышанам, тип яҙған опера йырсыһы. Билдәле булыуынса, Айгөл Әхмәтшина - Ҡырғыҙ-Миәкә ауылында тыуып үҫкән, Өфө сәнғәт училищеһын тамамлаған. Яҡташыбыҙ - билдәле донъя классик музыка лейблының эксклюзив артисы. Ул һуңғы 30 йылда контракт төҙөгән беренсе меццо-сопрано. Әйткәндәй, 2019 йылда Өфөлә Айгөл Әхмәтшинаның Рәсәйҙәге тәүге концерты үткәйне. Ул Башҡортостандың Милли симфоник оркестры менән сығыш яһаны.