Ғәҙәттән тыш хәлдәр буйынса дәүләт комитеты етәксеһе Кирилл Первов социаль селтәрҙә яҙыуынса, Торин ҡушаматлы эткә ярҙамға Гимли исемле көсөк үҫеп килә. Дүрт аяҡлы йәш ҡотҡарыусы – Ториндың ике туған ҡустыһы килеп сыға. Хәҙер уларға икәүләшеп берҙәм команда булып юғалған кешеләрҙе эҙләргә тура киләсәк. Бордер-колли тоҡомло Торин Төркиәлә ер тетрәгәндән һуң харабалар аҫтында ҡалған кешеләрҙе табып, бөтә донъяға танылды. Былтыр ул халыҡ-ара премияға лайыҡ булды.