Илдә йыл һайын ойошторолған акция күләмле байрамға әүерелеп өлгөрҙө. Быйыл 20-се тапҡыр уҙған саранан ғәҙәттәгесә, Өфө лә ситтә ҡалманы. Баш ҡалала акцияла ҡатнашыусылар өсөн 39 майҙан эшләне. БЮТ хәбәрсеһе Рәзилә Ғиниәтуллина дауам итә.
20, 40, 60 - диктант майҙанында төрлө йәштәгеләр бар. Йыл һайын ил халҡы белемен һынар өсөн, яңынан парта артына ултыра. Диктант яҙырға килер алдынан берәүҙәр етди әҙерләнә. Тел нормалары ҡағиҙәләрен барлай, мәктәп йылдарынан ҡалған белемен яңырта. Икенселәр уңыш йылмайыуына өмөт итә.
Ә кемгәлер тел ҡағиҙәләрен белеү - һөнәр талабы. Журналист, блогер, мәғлүмәт хеҙмәткәрҙәре өсөн айырым майҙан асылғайны.
Өфөләр юғары әүҙемлек күрһәтте. Акция майҙандарына халыҡ алдан уҡ теркәлгәйне. Быйылғы текст билдәле яҙыусы Анна Матвееваныҡы. Автор рус телен сит тел булараҡ өйрәнеүселәр һәм балалар өсөн ҡатмарлы булмаған текст әҙерләгән.
Балалар өсөн яҙма эш быйыл тәүгә ойошторолдо. Йәмғеһе диктантты баш ҡалала 39 майҙанда яҙҙылар.
Акция сиктәрендә рус теленән диктант Антарктидала һәм хатта самолет эсендә яҙылған. Акцияла бөтәһе 41 ил ҡатнашҡан.
Рәзилә Ғиниәтуллина