Федор Шаляпин исемендәге музыка музейы үҙенең тәүге ҡунаҡтарын ҡабул итә. Бөгөн уның экспозицияһын билдәле пианист Денис Мацуев менән күренекле актер Сергей Безруков баһаланы.
Рәсәйҙең халыҡ артистары Өфөнөң 450 йыллығына арналған саралар буйынса музыкаль фестиваль һәм яңы постановка менән килгән. Ҡунаҡтар өсөн залдар буйлап экскурсия ойошторолдо. Биш залдың һәр береһе билдәле бер темаға арналған. Баш ҡаланың тарихи үҙәгендәге музыка музейы 24 майҙа асылды. Был Башҡортостанда классик музыка тарихы буйынса экспонаттар коллекцияһы тупланған беренсе музыкаль-театр музейы. Фонд коллекцияһында 900-ҙән ашыу уникаль әйбер иҫәпләнә, уларҙың күп өлөшө 19-20 быуат башына ҡарай. Республика ҡунаҡтары Федор Шаляпин музейын юғары баһаланы
Башҡортостан башлығы Радий Хәбиров социаль селтәрҙәрҙә Денис Мацуев менән Сергей Безруковҡа республикаға иғтибары өсөн рәхмәт белдерҙе. Халыҡты концерт һәм спектаклдәр атмосфераһына сумдырыу, илебеҙҙең бөйөк мәҙәниәте менән таныштырыу мөмкинлеге булыуы бик мөһим. Уларҙың һәр береһен тамашасы ярата һәм «Башҡортостандың халыҡ артисы» тигән маҡтаулы исемде ғорурлыҡ менән йөрөтөүҙәренә ышанам, тип яҙған Радий Хәбиров.