«Һаулыҡ һаҡлау» милли проекты сиктәрендә яңы бинала балаларҙы һәм өлкәндәрҙе ҡабул итеү өсөн заманса шарттар булдырыла. Бында рентген диагностикаһы, УЗИ, эндоскопия тикшеренеүҙәре, терапия, хирургия, ҡатын-ҡыҙҙар консультацияһы бүлектәре эшләйәсәк. Тулыраҡ мәғлүмәт БЮТ хәбәрсеһе Флорида Ким яҙмаһында.
4 Әлегә төҙөлөш эштәре ҡайнап торған бина ярты йылдан заманса поликлиникаға әйләнәсәк. Эшселәр өс ҡатлы объектты төҙөп бөтөп биҙәү эштәренә күскән. Иркен, ҡеүәтле медицина учреждениеһы 320 кешене ҡабул итеү өсөн иҫәпләнгән. Табиптар кабинеттарынан тыш бында регистратура, холл, гардероб, хужалыҡ бүлмәләре лә йыһазландырыласаҡ.
Заманса объекттың майҙаны биш мең квадрат метр. Тәүге ҡатта рентген диагностикаһы бүлексәһе, балалар консультацияһы, дөйөм бүлмәләр урынлашҡан. Икенсе ҡатта эндскопия, хирургия, ҡатын-ҡыҙҙар консультацияһы бүлексәләре, терапевт, невролог, офтальмолог, отоларинголог кабинеттары, физиотерапия һәм терапия бүлексәләре эшләйәсәк.
Урындағы халыҡ түҙемһеҙләнеп көтөп алған яңы поликлиника октябрҙә төҙөлөп бөтәсәк һәм медицина ҡоролмалары урынлаштырылып файҙаланыуға тапшырылыр тип көтөлә. Һаулыҡ һаҡлауҙың тәүге звеноһын яңыртыу программаһы ауыл ерендә йәшәүселәр өсөн сифатлы медицина хеҙмәттәре ойоштороуҙы маҡсат итеп ҡуя.
Флорида Ким