Ҡоролманың уң яғында эш тамамланыуға бәйле транспорт хәрәкәте өсөн билдәләнгән участка йүнәлеше үҙгәртелә. Күперҙең икенсе өлөшөндә тимер-бетон ҡоролмалар металл конструкцияға яңыртыла башлай. Биләмәлә алып барылған эш менән БЮТ хәбәрсеһе Гөлназ Хәйбуллина таныштыра.
Ҡырҡ йыл элек төҙөлгән Шаҡша күперен нығытыу эштәре билдәләнгән графиктан алдараҡ бара. Планлаштырылған 800 тонна металл конструкцияларҙың яртыһы урынлаштырылған. Икенсе яҡҡа күсергә ваҡыт. Әлегә тиклем капиталь ремонт гидротехник ҡоролманың уң яғында барһа, июнь аҙағына юл хәрәкәте яңыртылған участка аша үтәсәк.
Күперҙең уң яҡ өлөшөндә юлға асфальт түшәргә, яҡтыртыу ҡоролмаларына терәүҙәр ҡуйырға ҡалған. Объектта көн һайын 70 төҙөүсе эшләй, ун берәмек техника йәлеп ителгән. Автомобилдәрҙе яңы һыҙат буйлап ебәрер алдынан киләһе ике аҙнала юл хәрәкәтен ваҡытлыса сикләү ҙә ҡаралған. Әлегә бөтә көстәр төҙөлөш эштәрен тиҙләтеүгә йүнәлтелгән.
Күперҙең ике яғынан локаль таҙартыу ҡоролмалары төҙөлә. Улар юлдағы ямғыр һәм бысраҡ һыуҙарҙың йылғаға төшөүен сикләп, экологик яҡтан хәүефһеҙлекте тәьмин итәсәк. Ошо маҡсатта биләмәлә торбалар һалына, инженер эштәр башҡарыла.
«Хәүефһеҙ һәм сифатлы юлдар» милли проекты буйынса алып барылған капиталь ремонтҡа 2 миллиард 161 миллион һумдан ашыу аҡса йүнәлтелгән. Килешеүгә ярашлы, подрядсы компания объектты киләһе йыл февралдә сафҡа индерергә тейеш. Әммә эш билдәләнгән графиктан өс-дүрт айға иртәрәк тамамланыр тип көтөлә.
Юлдағы ваҡытлыса сикләүҙәрҙең теүәл датаһы буйынса алдан иғландар була. Баш ҡала халҡын уңайһыҙлыҡтарҙы аңлап ҡабул итергә саҡыралар. Яңыртылған күпер тағы ла ярты быуаттан ашыу хеҙмәт итәсәк.
Гөлназ Хәйбуллина